OSCAR KUPEWA JEZI YA DROGBA CHELSEA.

KLABU ya Chelsea imethibitisha kuwa mshambuliaji mpya Oscar anatarajiwa kupewa jezi namba 11 ambayo alikuwa akivaa aliyekuwa mshambuliaji nyota wa klabu hiyo Didier Drogba ambaye ametimkia katika klabu ya Shanghai Shenhua ya China. Mchezaji huyo wa kimataifa kutoka Brazil ambaye kwasasa yuko na timu ya taifa ya nchi hiyo inayoshiriki michuano ya olimpiki atachukua nafasi ya Drogba ambaye ameondoka klabuni hapo kama mfalme baada ya kuiwezesha kutwaa taji la Klabu Bingwa ya Ulaya kwa mara ya kwanza msimu uliopita. Oscar alijiunga na Chelsea inayonolewa na kocha Roberto Di Matteo kutoka klabu ya Intercional mwezi uliopita kwa ada inayokadiriwa kufikia paundi milioni 25 na anatarajiwa kupigania nafasi katika kikosi cha timu hiyo akiwa na wakali wengine kama Eden Hazard, Juan Mata, Florent Malouda na Daniel Sturridge. Mchezaji huyo mwenye miaka 20 ambaye ana kipaji cha kipekee atafuata nyayo za wakali wengine kama Damien Duff na Boudewijn Zenden ambao wote walivaa jezi namba 11 kabla ya kupewa Didier Drogba.